Memoriaren artea eta artearen memoria hezkuntzan

Prozesu horren guztiaren emaitza da Erein argitaletxeak kaleratuko duen metodo didaktikoa. Euskal Herriko edozein eremuko eta adineko ikasleek erabiltzeko diseinatuta dago, hezkuntza formal nahiz ez-formalean, nahiz eta, batik bat, Lehen Hezkuntzako ikasleei zuzenduta egon. Hiru fasetan antolatutako metodo diziplinartekoa da eta arteen bidezko ikerketa nahiz ezagutza daude metodoaren oinarrian, baita enpatia historikoaren garapena ere. Gatazketara hurbiltzeko nahiz horien inguruan kritikoki eta sormenez, ikuspegi transformatzailetik hausnartzeko esperientzia interartistikoak proposatzen ditugu bertan Haur eta Gazte Literatura osagai garrantzitsua da prozesu horretan guztian zehar, euskal gatazkak hizpide dituzten literatur lanen irakurketa multidimentsional bat proposatzen baitugu, irakurketa une zehatzetan eten, eta baliabide interartistikoen bitartez nahiz askotariko jarduerak tartekatuz, gatazkak gorputzetik eta gorputzaren bitartez ezagutzeko, besteak beste.

Hiru urrats ditu metodoak, hasierako irekiera fase bat izateaz gain:

Lehen pausoa da XX-XXI. mendeetan Euskal Herrian eragina izan duen eta lantzeko asmoa dugun gizarte-gatazka aukeratzea. Hori egindakoan, gai horrekin lotuta metodoak eskaintzen duen corpusetik abestiak, margolanak, eskulturak eta bestelako material kultural eta artistikoak aukeratuko ditugu bigarren faserako, eta literatur lan bat hirugarren faserako.

Bigarrenean, beroketa fasean, gizarte-gatazka zehatzen lanketan sartu aurretik, gorputz adierazpena eta ahotsa aktibatzeko dinamika batzuk proposatzen ditugu, baita gatazkaren kontzeptu orokorrera gorputzetik hurbiltzeko diziplinarteko jarduerak ere. Saio bakoitza abiatu baino lehen egiteko ariketak dira, ondorengo jardueretarako zubi-lan gisa.

Hirugarrenak, gatazkarekiko hurbilpen interartistikoa du izena, eta, bertan, landu nahi dugun gizarte-gatazkaren testuinguruan murgilduko gara. Gatazken izaera poliedrikoa modu diziplinarteko eta interartistiko batean ulertzeko eta lantzeko, aldez aurretik corpusetik hautatutako hainbat objektu kultural nahiz artistiko baliatuko ditugu. Informazio historiografikoa ere proposatzen da, horren guztiaren osagarri.

Azkenengoan, irakurketa interartistikoan, landu nahi den gatazkaren gaia jorratzen duen obra literario baten irakurketa tartekatu eta konpartitu bat egingo dugu. Askotariko baliabide artistikoak erabiliz, irakurketa eten eta dimentsio berriak irekiko ditugu, emozioak aktibatuz eta gatazka horiek gorpuztuz. Fase honetan nahiz aurrekoan, sormen artistikorako eta hausnarketarako une konpartituak proposatzen ditugu, jorratzen diren egoera eta gaiei lotuta

Memoriaren Artea Hezkuntzan proiektua Errenteriako Herri Arte Eskolan jarri da martxan, lehen aldiz, 2023/2024 ikasturte hasieran. Sei astez, astero ordu eta erdiz, Artearen Memoria. Gatazken lanketarako proposamen didaktikoa materialarekin aritu dira lanean ikasleak, Eider Perez irakaslearen laguntzarekin.
8 eta 11 urte bitarteko haurrak Nemo kapitainaren azken bidaia (Castillo Suarez, 2017) narrazioa ardatz duen proposamen didaktikoan murgildu dira eta 12 eta 15 urte bitarteko gazteek Gerrak ez du izenik (Leire Bilbao eta Maite Mutuberria, 2013) album ilustratua oinarri duen proposamena izan dute langai. Denek ere material didaktiko honen oinarrian den hiru urratseko metodologiaren arabera antolatutako bidaia egin dute (1. Beroketa; 2. Gatazkarekiko hurbilpen interartistikoa; 3. Irakurketa interartistikoa).
Jarraian duzuen ikus-entzunezko honek Errenteriako Herri Arte Eskolako esperientziaren berri ematen du. Parte-hartzaileek eurek, haur eta gazteek, proposamen didaktiko honetan murgiltzearen esperientzia nolakoa izan den azaltzen dute: zer egin duten, nola sentitu diren, gatazkaren lanketan zein emozio azaleratu diren, zein gertakaritara hurbildu diren, eta esperientzia artistiko honek zer duen berezitik.